ABŞ və Ukraynanın səfirləri xalqımıza başsağlığı verdi

ABŞ-nin ölkəmizdəki səfiri Mark Libbi Xocalı soyqırımının 32-ci ildönümü ilə əlaqədar Azərbaycan xalqına başsağlığı verib.

Bu barədə diplomat rəsmi sosial media hesabında paylaşım edib.

“Bu gün Azərbaycan xalqının kədərini paylaşaraq 1992-ci ildə Xocalıda qətlə yetirilən yüzlərlə insanın xatirəsini yad edirik. Mən ABŞ-nin adından Xocalıda həlak olanların ailələrinə dərin hüznlə başsağlığı verir və Xocalıdan olan məcburi köçkünlərin kədərini bölüşürəm. Regionda sülh naminə çalışmaq və bu kimi faciələrin bir daha təkrarlanmamasını təmin etmək borcumuzdur”.

“Bu gün Xocalı faciəsinin qurbanlarını bütün azərbaycanlılarla birgə yad edirəm. Allah rəhmət eləsin!”.

Bu sözləri isə Böyük Britaniyanın ölkəmizdəki səfiri Ferqus Old "Ana harayı" abidəsini ziyarət etdikdən sonra öz rəsmi sosial media hesabında yazıb.

Bundan başqa, Xorvatiyanın Azərbaycandakı səfirliyi də paylaşım edərək soyqırımı qurbanlarının xatirəsini ehtiramla yad edib.

Ukraynanın Azərbaycandakı səfiri Vladislav Kanevski də ölkəmizə qarşı törədilən bu faciəyə səssiz qalmayıb:

"Bu gün qəlbimizi təsvirolunmaz ağrı və kədər doldurub. Xocalı faciəsi bəşəriyyət tarixinə ən faciəli səhifələrdən biri kimi həkk olunub. Kimsə 21-ci əsrdə Avropanın mərkəzində bu hadisələrin təkrarlana biləcəyini təsəvvürünə gətirə bilərdimi?”.