ADA Universitetinin əməkdaşları Gürcüstandakı azərbaycanlı tələbələrlə görüşdü

ADA Universitetinin məsul əməkdaşları Gürcüstanın müxtəlif ali məktəblərində təhsil alan yerli azərbaycanlı tələbələrlə görüşüblər.

Görüşdə universitetin prorektoru Vəfa Kazdal, tələbə qəbulu şöbəsinin əməkdaşı Mahnur Abbasova, Qazax Müəllimlər Seminariyasının layihə meneceri Samirə Ağayeva iştirak ediblər.

Azərbaycan Dövlət Neft Şirkətinin Gürcüstan nümayəndəliyinin Tbilisidəki Baş ofisində keçirilən görüşdə ADA-nın yaranması, beynəlxalq əməkdaşlıq əlaqələri, tələbə qəbulu qaydaları, təhsil və təqaüd proqramları, fakültələr, tələbələr üçün yaradılmış imkanlar və üstünlüklər barədə ətraflı məlumat təqdim olunub.

Tələbələrə ADA haqqında təqdimat da nümayiş etdirilib. Daha sonra isə gəncləri maraqlandıran suallar cavablandırılıb.

Görüşdə həmçinin Azərbaycanın Gürcüstandakı səfirliyinin nümayəndələri də iştirak ediblər.