Azərbaycan və Ermənistan hansı məsələdə razılığa gələ bilmir? | Bölgədə getdikcə artan gərginlik...

Nə qədər qəribə görünsə də, Ermənistan bir tərəfdən Azərbaycanla sülh danışıqları aparmaq istədiyini bəyan edir, digər tərəfdən maddi-mənəvi dəstək almaq üçün fərqli-fərqli ölkələrə üz tutur.

ABŞ ilə imzalanan strateji tərəfdaşlıq haqqında sazişin ardınca Avropa İttifaqının mülki missiyasının fəaliyyətinin uzadılması da elə bundan xəbər verir.

Ermənistan yenidən mülki missiyanın fəaliyyətinin 2027-ci ilin fevralın 19-dək uzadılması ilə bağlı qərarı qəbul edib.

Xatırlayırsınızsa, ilkin olaraq 100 müşahidəçidən ibarət missiya 2023-cü ilin fevral ayından fəaliyyətə başlamışdı. İndi isə müşahidəçilərin tərkibi 165 xarici və 44 ermənidən ibarət olacaq.

Missiyanın mandatı Ermənistan-Azərbaycan sərhədində sabitliyi təşviq etmək və etimad quruculuğuna töhfə vermək olsa da, şərti sərhədə gələn hər kəs əlinə bir binokl alıb sərhədlərimizi müşahidə etməyə çalışır. Bu da ölkəmiz üçün ən çox narahatlıq doğuran məsələlərdən biridir.

Ekspertlər düşünürlər ki, bu cür hərəkətlər missiyanın obyektivlik prinsipinə uyğun deyil və bölgədə gərginliyi azaltmaq əvəzinə Ermənistanın maraqlarına xidmət edir.

Ümumiyyətlə, Aİ missiyasının fəaliyyətinin uzadılması Qərbin Cənubi Qafqazdakı nüfuzunu artırmaq cəhdi kimi də qiymətləndirilə bilər. Lakin bu missiyanın sülh prosesinə töhfə vermədiyi ortadadır. Əgər o, neytral və balanslı fəaliyyət göstərməzsə, Azərbaycan bu məsələyə daha sərt reaksiya verə bilər.