Azərbaycan və Türkiyə arasında hərbi əməkdaşlıq | MN məlumat yaydı

Azərbaycanla Türkiyə arasında imzalanmış “İkitərəfli hərbi əməkdaşlıq proqramı”na əsasən, iki ölkənin Hərbi Hava Qüvvələri nümayəndələrinin iştirakı ilə 15-ci Qərargah danışıqları keçirilib.

Bu barədə Müdafiə Nazirliyindən məlumat verilib.

Keçirilən Qərargah danışıqlarının əhəmiyyətinin xüsusi vurğulandığı görüşdə Azərbaycan və Türkiyə HHQ arasında hərbi əməkdaşlıq məsələləri müzakirə olunub, qarşılıqlı təcrübə mübadiləsinin əhəmiyyəti qeyd edilib, eləcə də maraq doğuran bir sıra məsələlərə dair ətraflı fikir mübadiləsi aparılıb.

Sonra səfər planına uyğun olaraq, Aviasiya təmir zavodunu ziyarət edən Türkiyə nümayəndə heyətinə müəssisənin yaranma tarixi, inkişaf mərhələləri və fəaliyyəti barədə məlumat verilib.

Daha sonra Heydər Əliyev adına Hərbi İnstitutda yaradılan şəraitlə tanış olublar. Türkiyə nümayəndə heyətinə təhsil müəssisəsi ilə bağlı ətraflı məlumat verilib və ölkələrimiz arasında hərbi təhsil sahəsində görülən işlər və perspektiv planlardan geniş söhbət açılıb.

Plana əsasən, sonda Türkiyə nümayəndə heyəti HHQ-nin “N” saylı hərbi hissəsini ziyarət edib.