Azərbaycan və Türkiyə arasında texnologiya əməkdaşlığı güclənir - Baku TV

İnnovasiya və Rəqəmsal İnkişaf Agentliyi, Türk İnformasiya Texnologiyaları Sənayeçiləri Assosiasiyası və “Sistem Global Danışmanlık” konsaltinq şirkətinin tərəfdaşlığı ilə “Azərbaycan – Türkiyə biznes forumu: Rəqəmsal transformasiya və texnologiya körpüsü” adlı forum keçirilib.

Forumda Azərbaycan və Türkiyədən ümumilikdə 70 informasiya-kommunikasiya texnologiyaları şirkəti, maliyyə institutları, eləcə də hər iki ölkənin müxtəlif dövlət qurumlarının rəhbər şəxsləri iştirak ediblər.

Türkiyənin Azərbaycandakı fövqəladə və səlahiyyətli səfiri Birol Akgün bildirib ki, iki ölkə sözügedən sahədə koordinasiyalı addımlar atmaqla həm regional, həm də qlobal mövqelərini daha da möhkəmləndirir.

Forumun rəsmi hissəsində Türk İnformasiya Texnologiyaları Sənayeçiləri Assosiasiyasının İdarə Heyətinin sədri Mehmet Ali Tombalak, İnnovasiya və Rəqəmsal İnkişaf Agentliyinin kommersiya üzrə baş inzibatçısı Salar İmaməliyev və “Sistem Global Danışmanlık” şirkətinin İdarə Heyətinin sədri Hüseyin Karslıoğlu Azərbaycan və Türkiyə arasında İKT sahəsində güclənən əməkdaşlığın potensialına dair fikirlərini bölüşüblər.

Daha sonra Azərbaycan və Türkiyənin texnoloji və innovativ ekosistemlərindən bəhs edən panel müzakirələri baş tutub.

Forumun ikinci hissəsində Türkiyə və Azərbaycan şirkətlərinin, eləcə də dövlət qurumlarının iştirakı ilə ikili formatlarda görüş sessiyaları baş tutub.

Tədbir çərçivəsində həmçinin İnnovasiya və Rəqəmsal İnkişaf Agentliyi, Türk İnformasiya Texnologiyaları Sənayeçiləri Assosiasiyası və “Sistem Global Danışmanlık” şirkəti arasında üçtərəfli Anlaşma Memorandumu imzalanıb.