Azərbaycan xalqı əmin olsun, bir daha bu faciələr... | Prezident

“Şəhidlərimizin qəhrəmanlığı, fədakarlığı sayəsində biz bu gün buradayıq. Onlar sinələrini qabağa verərək düşmənə elə bir sarsıdıcı zərbə endiriblər ki, əminəm, bundan sonra Ermənistan heç vaxt Azərbaycana qarşı hər hansı bir hərbi təxribat törətməyə cəhd etməyəcək. Halbuki Ermənistanda revanşistlər də kifayət qədər çoxdur”.

Bunu Prezident İlham Əliyev Xocalı şəhərinə köçən sakinlərlə söhbəti zamanı deyib.

Dövlət başçısı bildirib ki, Ermənistandakı son hadisələr Azərbaycan tərəfindən izlənilir: “Ermənistanın bizə qarşı yenidən ərazi iddiaları irəli sürmək cəhdləri var. Ona görə də biz hər an hazır olmalıyıq. Əlbəttə ki, ilk növbədə ordumuzu daha da gücləndirməliyik və bunu edirik”.

İlham Əliyev hərbçilər üçün inşa edilən evlərlə də tanış olduğunu qeyd edib. O vurğulayıb ki, bütün Qarabağ və Şərqi Zəngəzur çox möhkəm bir istehkam zonası olacaq:

“Burada artıq bu istiqamətdə işlər görülür ki, Azərbaycan xalqı əbədi əmin olsun, bir daha bu faciələr bizim xalqımızın başına gəlməyəcək. Bu gün cəmi 8 ay ərzində bərpa edilmiş Xocalıda görüşməyimiz xüsusi məna daşıyır”.