Azərbaycanın dünyanı ətrafına toplaması çox vacibdir | Mark Libbi COP29-un önəmindən danışdı

“Azərbaycan üçün xüsusi önəm daşıyan bu tədbirdə mən qarşıdan gələn hadisələri görmək və proseslər zamanı bacardığımızı etmək üçün səbirsizlənirəm”.

Bu sözləri ABŞ-nin Azərbaycandakı səfiri Mark Libbi deyib.

O bildirib ki, COP29 konfransı geniş tərkibli keçirilir:

“Vaşinqtondan çox sayda ziyarətçi iqlimlə bağlı məqsədlərin müzakirəsi və ortaq razılığa gəlinməsi üçün Azərbaycana səfər edib. Lakin bununla yanaşı, biz ABŞ Biznes və Sivil Cəmiyyətinin də COP-29-a xüsusi marağı olduğunu və iqlimlə bağlı gələcək addımlarının təşviqini də müşahidə etdik. Ona görə də bu bir neçə həftə ərzində baş verənlər bizim üçün çox vacibdir.

Eyni zamanda bu COP digərlərindən maliyyə məsələlərinə fokuslanmasına görə fərqlənir. Bundan əlavə, illər keçdikcə iqlimlə bağlı problemlərin miqyası artır və məsələnin ciddiyyəti daha da böyüyür. Elə bu səbəbdən də ildən-ilə keçirilən konfransların önəmlilik dərəcəsi də bir o qədər artır”.

Mark Libbi əlavə edib ki, Azərbaycanın dünya ölkələrini ətrafına toplaması, iqlim və tibbə dair məsələləri müzakirə etməsi də çox vacibdir:

“Onu da qeyd edim ki, ABŞ Prezidentinin Beynəlxalq İqlim Siyasəti üzrə baş müşaviri Con Podesta, konqres üzvləri, hökumət rəsmiləri, QHT-lər və onlarla insan bu konfransı dəstəkləmək üçün Azərbaycana gəlib”.