Azərbaycanla sərhəddə bu postlar olmayacaq | Paşinyan
“Azərbaycanla razılaşmaya əsasən, delimitasiya olunmuş ərazilərə sərhəd qoşunları yerləşdiriləcək”.
Bunu Ermənistanın Baş naziri Nikol Paşinyan ölkənin İctimai Televiziyasına müsahibəsində deyib.
O, sərhəddə Müdafiə Nazirliyinin postlarının olmayacağını vurğulayıb.
Baş nazir onu da vurğulayıb ki, Azərbaycanla bağlı demarkasiya prosesi mümkün qədər tez aparılmalıdır:
“Azərbaycanla razılaşmaya əsasən, sərhəd qoşunları delimitasiya olunmuş ərazilərə yerləşdiriləcək. Çünki sərhədlərdə təhlükəsizliyi təmin etmək onların mandatına aiddir. Yəni sərhəddə Müdafiə Nazirliyinin postları olmayacaq.
Demarkasiya məsələsinə gəldikdə isə bildirmək istəyirəm ki, bu proses də mümkün qədər tez aparılmalıdır. Sual olunacaq ki, niyə? Demarkasiya edilmədiyindən münaqişə üçün müəyyən şəraitin ola biləcəyini başa düşmək olar, buna görə də biz vəziyyəti maksimum idarə etmək üçün münaqişə potensialı ən çox olan yerlərdən başlayırıq”.