Bakıda Azadlıq meydanındakı möhtəşəm parad dünya mətbuatında

Vətən müharibəsində qazanılan şanlı Qələbənin beşinci ildönümü münasibətilə Bakıda keçirilən möhtəşəm hərbi parad dünyanın bir sıra ölkələrinin aparıcı media qurumlarının diqqət mərkəzində olub.

Yayımlanan xəbərlərdə Azərbaycan Prezidenti İlham Əliyevin, Türkiyə Prezidenti Rəcəb Tayyib Ərdoğanın və Pakistanın Baş naziri Məhəmməd Şahbaz Şərifin çıxışlarında səsləndirdiyi fikirlərə yer verilib.

Məqalələrdə Azərbaycanın 44 günlük müharibədə tarixi Qələbəsindən sonra Asiya və Avropada geosiyasi balansın dəyişdiyi, həmçinin Azərbaycanın ərazi bütövlüyünün və suverenliyinin bərpasının bütün türk dünyası üçün əhəmiyyəti, eləcə də regionda sülh, inkişaf və əmin-amanlıq üçün yeni səhifə açdığı xüsusi vurğulanıb.

Bundan başqa, Qələbənin qazanılmasında Azərbaycan Ordusunun qəhrəmanlığı və xalqın birliyinin rolu xatırlanıb, işğaldan azad olunan ərazilərdə inkişaf, sülh və əmin-amanlığın bərqərar olduğu qeyd olunub.

Dünyanın aparıcı informasiya agentlikləri, televiziya kanalları, qəzetləri və xəbər portalları milyonlarla tamaşaçının və oxucunun diqqətini paradda nümayiş etdirilən hərbi texnika və silahlara cəlb edib. Azərbaycanın xüsusilə hava və hava hücumundan müdafiə qüvvələri arsenalını ən müasir silah və müdafiə sistemləri ilə inkişaf etdirdiyi və paradın Azərbaycan Ordusunun hərbi qüdrətini tam şəkildə tərənnüm etdiyi bildirilib.