Bakıda "Euronews" televiziyasının yerli ofisi fəaliyyətə başladı

Bakıda “Euronews” televiziyasının yerli ofisi fəaliyyətə başlayır. Bu münasibətlə təşkil olunan açılış mərasimində media nümayəndələri, diplomatlar və digər qonaqlar iştirak ediblər.

Tədbirdə çıxış edən "Euronews"un Direktorlar Şurasının sədri Pedro Varqas David bildirib ki, rəhbərlik etdiyi media qurumu Azərbaycana qarşı həmişə balanslı mövqe nümayiş etdirib və bu mövqeyə görə təzyiqlərə məruz qalıb.

O, Avropanın nüfuzlu media qurumunun Bakı ofisinin açılışından məmnunluq duyduğunu qeyd edib:

“Biz Azərbaycanda media və jurnalistika sahəsini gücləndirmək istəyirik. Mövcud vəziyyəti və çətinlikləri başa düşürük, bu bir inkişaf prosesidir. Avropalı və azərbaycanlı jurnalistlərin birlikdə işləməsi peşənin inkişafına, daha müstəqil və azad medianın formalaşmasına töhfə verəcək. Bakıda təxminən 15 nəfərlik bir komanda olacaq. Hazırda onların yarıdan çoxu artıq işə qəbul edilib. Gələcəkdə onların sayını artırmaq niyyətindəyik. Biz bunu daha əvvəl Özbəkistan, Qazaxıstan və Qətər kimi ölkələrdə təcrübədən keçirmişik”.

Pedro Varqas Davidin sözlərinə görə, Bakıda ofisin açılması kanal üçün mühüm mərhələdir, “Euronews”un regiondakı mövqelərinin gücləndirilməsinin rəmzidir, hadisələrin obyektiv və qərəzsiz işıqlandırılması sahəsində Azərbaycanla əməkdaşlığın davamıdır.

Mərasim zamanı “Euronews”un Azərbaycanla əməkdaşlıq çərçivəsində həyata keçirilən layihələri təqdim olunub. Həmçinin Mərkəzi Asiya və Cənubi Qafqaz ölkələrinin liderlərindən regionun Avropa ilə münasibətlərinə təsir edən əsas siyasi, iqtisadi və sosial proseslər barədə alınan müsahibələri əhatə edən “Eurasia Talks” verilişi nümayiş etdirilib. Tədbir mədəni proqramla yekunlaşıb.

Qeyd edək ki, “Euronews” 1993-cü il yanvarın 1-də yaradılıb.