Ballistik raketlər atıldı | Ukraynada yaşayan azərbaycanlılar yaşadıqları dəhşəti danışdı

2024-cü ildə Ukraynada yaşayan azərbaycanlılar arasında daha çox ölkənin şərqində və cənubunda qalanlar zərər çəkiblər.

Donetsk vilayətində evsiz qalan onlarla azərbaycanlı ilə yanaşı, həlak olanlar da olub.

“Dəfələrlə yaşadığım evin yanına ballistik raketlər düşüb, sağ qalmağım bir möcüzədir. Çox çətinliklər çəkdik. Uzun illərdir burada yaşayıram. İşimi, evimi qoyub gedə bilmirəm. Çünki əziyyət çəkərək burada işimi qurmuşam”, – deyə Kiyev sakini Şamxal Quliyev söyləyib.

Birləşmiş Ukrayna Azərbaycanlıları Konqresinin sədri Rövşən Tağıyev bildirib ki, Ukrayna genişmiqyaslı müharibədən ciddi əziyyət çəkir:

“2024-cü il də 2022 və 2023-cü illər kimi çətin olub. Bu həm iqtisadi, həm də sosial sahədə özünü göstərir. Onlarla azərbaycanlı bu il də həyatını itirib. Məsələn, ötən həftə növbəti hava zərbələri Kiyevin mərkəzinə olub. Nəticədə Azərbaycan mətbəxini təmsil edən böyük bir restoran dağılıb, o cümlədən ona bitişik diasporumuza aid ofis də darmadağın olub. Ümid edirik ki, müharibə tezliklə bitəcək. Çətinliklərə baxmayaraq, işləməyə davam edirik”.

Qeyd edək ki, Ukraynada müharibə 2024-cü ilin sonunda daha qaynar fazaya keçid alıb.