Baş Prokurorluqdan Arutyunyan, Babayan və digərlərinin həbs müddəti barədə açıqlama

Araik Arutyunyan, Davit Babayan və digərlərinin həbs müddəti uzadılıb.

Bu barədə Baş Prokurorluqdan məlumat verilib.

Bildirilib ki, Azərbaycanın Qarabağ bölgəsinin və digər suveren ərazilərinin Ermənistanın hərbi təcavüzü nəticəsində işğal olunduqdan sonra yaradılan qondarma qurumun “prezidentləri” olmuş Arkadi Qukasyan, Bako Saakyan, Araik Arutyunyan, sabiq “xarici işlər naziri” Davit Babayan, eləcə də “parlament sədri” David İşxanyan, generallar David Manukyan və digərlərinin barəsində seçilmiş həbs qətimkan tədbirlərinin müddətinin uzadılması ilə bağlı Baş Prokurorluğun İstintaq idarəsinin vəsatətlərinə və Baş prokurorun təqdimatlarına Binəqədi Rayon Məhkəməsində baxılıb.

İstintaqı Baş Prokurorluğun rəhbərlik etdiyi Hərbi Prokurorluq, Dövlət Təhlükəsizliyi Xidməti, Daxili İşlər Nazirliyi və digər istintaq qurumlarının peşəkar əməkdaşlarından ibarət birgə istintaq qrupu tərəfindən aparılan cinayət işi üzrə separatçı rejimin ümumilikdə 14 nəfər üzvü Cinayət Məcəlləsinin müxtəlif maddələri ilə məsuliyyətə cəlb olunub.

Məhkəmənin qərarına əsasən, qeyd olunan şəxslərin barəsində seçilən həbs qətimkan tədbirinin müddəti uzadılıb.