Belçika XİN rəhbəri Azərbaycanı günahlandırıb

Belçikanın xarici işlər naziri Hadija Labib regiona səfəri çərçivəsində Azərbaycana gələcək.

Ölkəmizdə səfərdə olan digər dövlətlərin xarici işlər nazirləri adətən Prezident İlham Əliyev tərəfindən qəbul olunur, ikitərəfli münasibətlər, regionda və dünyada aktual məsələlər ətrafında fikir mübadiləsi aparılır.

“APA”nın əldə etdiyi məlumata görə, ermənipərəst mövqeyinə və Ermənistanda səfərdə olarkən səsləndirdiyi əsassız iddialara görə Prezident İlham Əliyev Belçika XİN rəhbərini qəbul etməyəcək.

Qeyd edək ki, avqustun 22-də Belçikanın xarici işlər naziri Hadija Labibin regiona səfəri başlayıb. O, ilk olaraq Ermənistana səfər edib, avqustun 23-də isə Gürcüstanda olub. Ermənistanda qondarma “erməni soyqırımı” abidəsini də ziyarət edən Hadija Labib bu ölkənin xarici işlər naziri və Baş naziri ilə görüşlərində ermənipərəst mövqeyini bir daha ortaya qoyaraq Azərbaycanın ünvanına əsassız iddialar səsləndirib.