BMT Bakı Təhlükəsizlik Forumunun Bəyannaməsini rəsmi beynəlxalq sənəd kimi yayımladı

Bakı Təhlükəsizlik Forumunun Bəyannaməsi artıq dünyanın ən ali beynəlxalq platformalarında BMT Baş Assambleyası və Təhlükəsizlik Şurasının sənədi kimi yayımlanıb.

21 sentyabr 2025-ci ildə keçirilən III Bakı Təhlükəsizlik Forumu “Terror aktları və silahlı münaqişələr zamanı humanitar böhranların və qlobal texnogen fəlakətlərin qarşısının alınması” mövzusunda beynəlxalq təhlükəsizlik gündəminin əsas sənədlərindən birinə çevrilib.

Bu dəfə Forum öz tarixində mühüm bir yeniliyi ilə yadda qalıb. Bakı Təhlükəsizlik Forumunun Əsasnaməsi və Bəyannaməsi qəbul edilib, həmçinin dünyada ilk dəfə xüsusi xidmət və təhlükəsizlik orqanları arasında 24/7 rejimində işləyəcək Antiterror İnformasiya Mübadiləsi Sisteminin yaradılması barədə qərar elan olunub.

Azərbaycan Dövlət Təhlükəsizliyi Xidmətinin təşkilatçılığı ilə baş tutan tədbirdə dünyanın bütün qitələrini təmsil edən 90-a yaxın xüsusi xidmət orqanının rəhbərləri iştirak edib. Prezident İlham Əliyevin Forum iştirakçılarına müraciətində qeyd olunur ki, Bakı bu gün qlobal və regional təhdidlərin təhlili, təhlükələrin neytrallaşdırılması yollarının araşdırılması üçün unikal əməkdaşlıq məkanına çevrilib.

Forumun Bəyannaməsində iştirakçı ölkələr beynəlxalq hüququn əsas prinsiplərinə sadiqliklərini təsdiqləyərək transmilli cinayətkarlıq və beynəlxalq terrorçuluğa qarşı mübarizədə daha sıx əməkdaşlıq, davamlı məlumat mübadiləsi və birgə qətiyyətli addımların atılmasının vacibliyini bəyan ediblər.

BMT Baş Assambleyası və Təhlükəsizlik Şurasının Forum Bəyannaməsini rəsmi sənəd kimi yayması isə Azərbaycanın təşəbbüslərinin, beynəlxalq səviyyədə artan nüfuzunun bariz göstəricisidir.