“Bu sülhün güclənməsinə töhfə verəcək” | İrəvan üçün yeni dönəm?

Ermənistanın vətəndaş cəmiyyəti nümayəndələri yaxın vaxtlarda Azərbaycana səfər edəcəklər.

Belə bir açıqlama ilə Ermənistan Təhlükəsizlik Şurasının katibi Armen Qriqoryan çıxış edib.

O xatırladıb ki, bu il oktyabrın 21-22-də ilk dəfə olaraq Azərbaycanın vətəndaş cəmiyyəti nümayəndələrindən ibarət heyət ikitərəfli dəyirmi masada iştirak üçün İrəvanda olub.

Armen Qriqoryanın sözlərinə görə, Ermənistanın vətəndaş cəmiyyəti nümayəndələrinin də yaxın vaxtlarda Azərbaycana səfəri gözlənilir.

“Bu cür səfərlər və mübadilələr iki cəmiyyət arasında qarşılıqlı etimad və anlaşmanın, eləcə də Ermənistan və Azərbaycan arasında sülhün güclənməsinə töhfə verəcək”, – deyə o əlavə edib.

A.Qriqoryan Ermənistan-Türkiyə sərhədinin açılmasına da münasibət bildirib.

“Sərhədlərin açılması həm xalqlarımıza, həm də iqtisadiyyatlarımıza qarşılıqlı fayda gətirə, Ermənistan və Türkiyə arasında ticarət dövriyyəsini 200% artıra bilər. Türkiyə ərazisindən istifadə Ermənistan və Şərqi Avropa arasındakı ticarət yolunu 10-25%, Ermənistan və Mərkəzi Avropa arasında isə 5-15% qısalda bilər”, – deyə o qeyd edib.