Cənubi Qafqaz üçün kritik görüş | “3+3” formatında görüşə kim ev sahibliyi edəcək?

“Ermənistan “3+3” formatında görüşə ev sahibliyi etməyə hazırdır”.

Bu sözlər “Sputnik Armenia”da Ermənistan Xarici İşlər Nazirliyinə istinadən yayılan xəbərdə qeyd olunub.

Bildirilib ki, görüşün keçiriləcəyi dəqiq yer və vaxt barədə məlumat yoxdur. Daha əvvəl Ermənistan xarici işlər nazirinin müavini Vaan Kostanyan IRNA-ya müsahibəsində qeyd edib ki, “3+3” formatında görüş ya İrəvan, ya da Bakıda baş tuta bilər.

“İrəvan “3+3” formatında nazirlər səviyyəsində görüşə ev sahibliyi etməyə hazırdır. Eyni bəyanatla Bakı da çıxış edib”, – deyə Ermənistan Xarici İşlər Nazirliyindən bildirilib. Görüşün dəqiq yer və tarixi müzakirələrdən sonra məlum olacaq.

Rusiyanın xarici işlər naziri Sergey Lavrov da ermənistanlı həmkarı Ararat Mirzoyanla görüşdən sonrakı mətbuat konfransında Cənubi Qafqazla bağlı “3+3” formatında nazirlərin növbəti iki görüşünün İrəvan, yaxud Bakıda keçirilməsinin tərəfdarı olduğunu açıqlayıb.

Qeyd edək ki, “3+3” formatı Azərbaycan, Ermənistan, Gürcüstan, Türkiyə, İran və Rusiyadan ibarətdir. Lakin Gürcüstan hələ ki bu formatda görüşlərə qatılmır.