Elçin Məmmədova ali hərbi rütbə verildi | Prezidentdən sərəncam

Prezident İlham Əliyev Daxili İşlər Nazirliyinin Daxili Qoşunları hərbi qulluqçularının “Hərbi xidmətlərə görə” medalı ilə təltif edilməsi haqqında sərəncam imzalayıb.

Sənədə əsasən, xidməti vəzifələrini və hərbi hissə qarşısında qoyulmuş tapşırıqları yerinə yetirərkən fərqləndiklərinə görə Daxili Qoşunların 12 hərbi qulluqçusu “Hərbi xidmətlərə görə” medalı ilə təltif ediliblər.

Dövlət başçısnın digər sərəncamı ilə polkovnik Elçin Məmmədova “general-mayor” ali hərbi rütbəsi verilib.

Qeyd edək ki, Elçin Məmmədov Daxili Qoşunların Qala qəsəbəsində yerləşən Ali Hərbi Məktəbinin rəisidir. O, bu vəzifəyə 2023-cü ilin iyununda təyin olunub. Həmin təyinatadək Elçin Məmmədov Daxili Qoşunların Qəbələ rayonu ərazisində yerləşən "N" saylı hərbi hissəsinin komandiri olub. O, 44 günlük Vətən müharibəsində iştirak edib və Prezident İlham Əliyevin sərəncamı ilə “Vətən uğrunda” medalı ilə təltif edilib. Əslən Cəbrayıl rayonundan olan Elçin Məmmədov İstanbul Levent Hərbi Akademiyasında ali təhsil alıb.