Elə bir Urartu kitabəsi yoxdur ki, orada erməni və ya haylardan bəhs olunsun

“Qərbi Azərbaycan Xronikası” layihəsi çərçivəsində “Göyçədəki qalalar urartuluların yox, İç Oğuzlarındır” adlı veriliş efirə gedib.

Verilişdə tədqiqatçı Ramin Əlizadə ermənilər tərəfindən dağıdılmış Göyçə mahalının Basarkeçər rayonunun Zağalı kəndində Urartu gerçəklərindən və erməni saxtakarlığından söz açır.

Qeyd olunur ki, Göyçədə yaşayan tayfalar urartuluların hücumlarının qarşısını almaq üçün uzun müddət mübarizə aparıblar:

“Göyçənin adı, Geğam, Geğarkunik sözü türklərin Gehu şəhərinin adından götürülüb. Göyçədə olan qalalar urartuluların deyil, İç Oğuzlarındır. Aşşurlar Biayin tayfalarının yaratdığı dövlətə Urartu-Dağlıq ölkə deyiblər. Sarduri Zağalı kəndi ətrafında kitabədə yerli tayfalar haqqında mühüm məlumatlar verib.

Zağalı yazısında qeyd olunan Urte ölkəsi Yurd mənası verir və türklərə aiddir. Qərbi Azərbaycanın yerli tayfaları Göyçə Ağbaba, Şörəyel, Loru ərazisində Urartuya qarşı ciddi müqavimət göstəriblər”.

Sonda vurğulanır ki, Qərbi Azərbaycanın tarixi mədəni irsi üzərində qondarma Armeniya mifologiyası qurulub:

“Urartu kitabələrində erməni və ya haylardan bəhs olunmur. Qədim və müasir ermənicənin Urartu dili ilə qrammatika və morfologiya baxımından heç bir bənzərliyi yoxdur. Urartunun tarixini tədqiq edən araşdırmaçılar ermənilərin iddiasını yalan hesab edirlər. Piotrovski Urartu maddi-mədəni irsinin ermənilərlə heç bir əlaqəsinin olmadığını sübut edib”.