Ərdoğan daha 5 il Türkiyəyə rəhbərlik edəcək

Türkiyədə Prezident seçkilərinin ikinci turunda Rəcəb Tayyib Ərdoğan qələbə qazanmaqla, daha 5 il ölkəyə rəhbərlik edəcək. Bu nəticə ilə təkcə terrorçularla əməkdaşlıq edən və onların dəstəyinə güvənən Kamal Kılıçdaroğlu yox, həm də Qərb imperializmi, İran, Ermənistan və onların havadarları məğlub oldular. Müdrik türk xalqı öz qətiyyətli qərarını verməklə, Türkiyənin İraq və Suriya çevrilməsinin, dolayısı ilə bataqlığa sürüklənməsinin qarşısını aldı.

Rəcəb Tayyib Ərdoğan Prezident seçilməklə həm də kənar güclərin təsiri ilə ölkənin müharibələrə sürüklənməsi ilə bağlı planların üstündən xətt çəkdi. Çünki K.Kılıçdaroğlunun vətən xainləri ilə, dövlətə və millətə qarşı çıxan şəxslərlə bir araya gəlməsi, onlarla qol-boyun olması, terror təşkilatlarını müdafiə edən şəxslərlə görüşməsi, bu terror təşkilatlarını dəstəkləyən güc mərkəzləri ilə əməkdaşlıq etməsi və onların dəstəyinə güvənməsi sirr deyildi. Yəni Kamal Qılıncdaroğlunun hakimiyyətə gəlməsi birbaşa türk dünyasına ciddi zərbə vuracaqdı və Türkiyəni yenidən kənar güclərin əlində oyuncağa çevirəcəkdi.

Təbii ki, bundan sonra Azərbaycan-Türkiyə qardaşlığı daha da güclənəcək, türk dünyasının inteqrasiyasının yeni erası başlayacaq. Prezident İlham Əliyevin Ərdoğanı ilk təbrik edən lider olması və onu ilk səfər olaraq Azərbaycana dəvət etməsi də bu seçkilərdə Azərbaycan-Türkiyə qaraşlığının və ümumlikdə türk dünyasının qələbə qazanmasını nümayiş etdirdi.