Erməni ziyalılar Azərbaycan mədəni irsinin müdafiəsinə qalxdı | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində “Erməni ziyalılar Azərbaycan mədəni irsinin müdafiəsinə qalxdı” adlı veriliş efirə gedib.

Verilişdə erməni kilsəsi və alimləri indiki Ermənistanda azərbaycanlıların tarixi izlərini, yaratdığı maddi mədəniyyət nümunələrini dağıtmaq, saxtalaşdırmaq yolu ilə onların bu ərazidə mövcudluğunu danmaq istiqamətində 200 ildən çoxdur çalışdıqlarını etiraf edirlər.

Bildirilir ki, 2019-cu ildə etnoqraflar Arsen Hakopyanın, Lusine Xaratyanın və Rafik Kortoşyanın müəllifi olduğu “Ermənistanın sovet keçmişindən epizodlar: erməni-azərbaycanlı birgəyaşayışının izləri ilə” adlı kitabda ermənilərin bu illər ərzində səylə silmək istədikləri Azərbaycan izləri öz alimləri tərəfindən təqdim olunur, Ermənistan dövlətinin və ictimaiyyətin Azərbaycanlılara məxsus abidələrin dağıdılması istiqamətində apardıqları məkrli siyasət ifşa edilir.

Yazıçı, ədəbiyyatşünas, ictimai xadimi, 2007-ci ildən Avrasiya Əməkdaşlıq Fondunun direktoru Gevorq Ter-Qabrielyan, kitabın müəllifləri – etnoqraf Levon Abrahamyan və Arsen Hakopyandan sitatlar, qeydlər verilir, onların sözləri ilə Ermənistanın sovet dövrü tarixində azərbaycanlıların mədəni irsinin lazımi səviyyədə öyrənilmədiyi vurğulanır.

Verilişdə tanınmış jurnalist Marina Martirosyanın 1882-ci ildə yaranan Azərbaycan Teatrının tarixini 50 il cavanlaşdırması, proqressiv görünmək istəyən erməni ziyalılarının özündə şovinizm mərəzi, tarixi öz maraqlarına uyğun dəyişmək meyilləri göstərilir.