Ermənilər 36 il sonra Qafanda törətdikləri cinayəti etiraf etdi | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində “Bakıda təhsil alan erməninin Qafan cinayətlərini malalamaq istəyi” adlı veriliş efirə gedib.

Verilişdə Qafan Geologiya Muzeyinin direktoru, tanınmış tədqiqatçı Qrişa Smbatyan və Qafanda məsul vəzifələrdə çalışmış, Bakıdakı partiya məktəbinin tələbəsi olmuş Volodya Martirosyanın 1987-ci ilin noyabrında Qafanda baş verən hadisələr ilə bağlı fikirlərinə yer verilir.

Onlar Qafan azərbaycanlıları haqqında danışaraq etiraf edirlər ki, Qafanda və ətraf kəndlərdə azərbaycanlılar kifayət qədər sıx şəkildə yaşayırdılar: “Onlar özlərini burada yaxşı hiss edirdilər. Doğrudan da, azərbaycanlılar çox fəal idilər. Onların təbii artımı var idi. Bizimkilər isə buna qarşı çıxırdı və səssiz daxili mübarizə aparırdılar. Biz qonşuluq edirdik, amma həmişə daxili inamsızlıq mövcud olub. Zorakılığın baş verdiyini deyə bilərəm. Stomatoloq Aftandilin “Jiquli” avtomobilini ermənilər dərəyə yuvarladılar. Bu, ən böyük zorakılıq idi”.

Ümumiyyətlə, 1988-ci il hadisələrinin 35 illiyi ərəfəsində erməni tarixçiləri baş verənlərlə bağlı uydurmalara başlasalar da, ancaq bəzi araşdırmaçılar gerçəkləri etiraf edirlər. Q.Smbatyan dəfələrlə müsahibə, çıxış və məqalələrində Qərbi Azərbaycanda, xüsusən də Qafanda azərbaycanlıların ermənilərə qarşı xoş münasibətindən, 1918-21-ci illərdə Njdedin başçılığı ilə ermənilərin silahlanaraq azərbaycanlıları öldürmələrinə, talanlarına baxmayaraq, sonrakı illərdə qonşu kimi yaxşı rəftar etdiklərini bildirib.