Ermənilərin bütün arzuları ürəyində qaldı | Bu tarix milli yaddaşımıza həkk olunmalıdır!

Prezident İlham Əliyevin Sərəncamına əsasən, sentyabrın 20-si artıq ölkəmizdə Dövlət Suverenliyi Günü kimi qeyd olunacaq.

Bu tarixi gün bizim üçün uzun illərin ağrı-acısı, çoxlu itkilər hesabına başa gəlib. Məlum Sərəncam Azərbaycanla Ermənistan arasında uzun illər davam etmiş Qarabağ münaqişəsinin birdəfəlik yekunlaşmasının məntiqi sonluğudur.

Ölkəmiz ərazi bütövlüyünü, torpaqları üzərindəki suverenliyini bərpa etmək üçün illərlə mübarizə aparıb. Hər zaman danışıqlar masası ətrafında bu problemin diplomatik yolla həlli üçün çalışdıq, beynəlxalq tribunalar vasitəsilə dünyaya haqq səsimizi çatdırdıq.

BMT Təhlükəsizlik Şurasının qətnamələrinin yerinə yetirilməsi üçün həm Ermənistan hakimiyyətinə, həm də dünya ölkələrinə çağırışlar etdik. Lakin gördük ki, diplomatiya mövcud şəraitdə sözünü deyə bilməyəcək. Xalqımızın illərlə üz-üzə qaldığı ədalətsizlik 44 günlük müharibənin başlamasına zəmin hazırlayıb.

Hər şey 44 günlə yekunlaşmayıb. Ermənilər 10 noyabr kapitulyasiya aktına imza atsalar da, bu imza ilə üzərilərinə götürdükləri öhdəliklərə əməl etməyiblər. Qarabağa qanunsuz yollarla silahlar daşınıb, ərazilərimizdə yerləşdirdikləri mina xəritələrini verməkdən boyun qaçırıblar, azad etdiyimiz torpaqlarda təxribatlar törədiblər.

Amma 2023-cü il 19 sentyabrdakı antiterror tədbirlərindən sonra illərdir böyüdüb bəslədikləri, dünyaya respublika olaraq tanıtmağa çalışdıqları Arsax adlı qondarma qurumla vidalaşmalı olublar.

Hər bir xalqın arzusu azad, bütöv torpağında yaşaya bilməkdir. Biz də bu günü 30 ildən çoxdur ki, gözləyirdik. Nəhayət ki, o gün gəldi. Suveren ölkədə yaşaya bilməyin xoşbəxtliyini isə qəhrəman əsgərlərimizə borcluyuq.