Ermənilərin xain niyyəti | Tələ tipli sürpriz qurğular...

Azərbaycan minalardan ən çox zərər çəkən ölkələrdən biridir.

Ölkəmizdə mina problemi Ermənistanın 30 il işğal altında saxladığı ərazilərimizdə davamlı minalar yerləşdirməsi səbəbindən meydana gəlib.

Əsas hissəsini mülki şəxslərin təşkil etdiyi mina qurbanlarının sayının artması da bu təhlükənin ciddiliyinin bariz göstəricisidir. Bu gün işğaldan azad edilən ərazilərimizin Ermənistan tərəfindən kütləvi şəkildə minalar və digər partlayıcı qurğularla çirkləndirilməsi ilə yanaşı, heç bir hərbi əhəmiyyət daşımayan ərazilərdə də xeyli sayda tələ tipli partlayıcı qurğuların yerləşdirilməsi faktlarına rast gəlinir.

Minatəmizləmə əməliyyatlarında müxtəlif təyinatlı və vəziyyətdə tələ tipli qurğular da aşkar edilir. Daxilində partlayıcı maddə olan, ilk baxışdan təhlükəsiz görünən, lakin yaxınlaşdıqda gözlənilmədən işə düşərək qurbanını öldürmək və yaxud ona xəsarət yetirmək üçün düşünülmüş tələlər sürpriz qurğular sayılır.

Ermənilər ölkəmizə qarşı cinayətlərində “sürpriz” minalardan daha çox istifadə ediblər. Məqsəd isə insanların kütləvi məhvinə nail olmaq idi.

Qeyd edək ki, Vətən müharibəsindən sonra yüzlərlə vətəndaşımız mina partlayışlarının qurbanı olub. Onlardan 60-dan çoxu dünyasını dəyişib. Ölkəmizdə mina qurbanlarının 70 faizdən çoxu mülki şəxslərdir.