Ermənistan hakimiyyətinin qəbir cinayətini erməni jurnalisti ifşa etdi | QƏRBİ AZƏRBAYCAN XRONİKASI
“Qərbi Azərbaycan Xronikası” layihəsi çərçivəsində “Ermənilərin ölülərə qarşı qisas cinayəti” adlı veriliş efirə gedib.
Verilişdə bir neçə beynəlxalq mükafata layiq görülən Pəmbək mahalının Qarakilsə şəhərində çalışan jurnalist Naira Bulqadaryanın Qərbi Azərbaycanda olan qəbirlərlə bağlı məqaləsinə yer verilib. Verilişdə qəbir və qəbiristanlığın bütöv bir millətin tarixini, adətini göstərən memarlıq nümunəsi, sivil xalqların ehtiramla yad etdikləri, qoruduqları yerlər kimi təqdim olunur, Azərbaycanda müxtəlif dövrlərə və müxtəlif xalqlara məxsus qəbir yerlərinin ehtiramla qorunduğu qeyd edilir.
Bildirilir ki, XX əsr ərzində Qərbi Azərbaycanda qətliamlar törədən ermənilər bir neçə dəfə Azərbaycan türklərinə məxsus məscid, türbələri yandırıb, qəbiristanlıqları yerlə bir ediblər. İrəvan şəhərindəki Təpəbaşı məhəlləsində və ya Dəmirbulaqda olan qəbirlər yerlə-yeksan olunub, izi-tozu qalmayıb:
“Toxmaqgöl qəbiristanlığı da 1988-ci ildə buldozerlərlə məhv edilib. Dəmirbulaqda olan qəbiristanlığın yerində Türkiyədən köçürülən ermənilər üçün evlər tikilib. Neçə-neçə kənd, şəhər və mahallar boyunca səpələnmiş Azərbaycan türklərinin qəbir yerləri yerlə-yeksan edilib. Bu, Ermənistanın dövlət səviyyəsində həyata keçirdiyi vandalizm siyasətidir”.
![icon](/images/loading.png)