Ermənistan Müdafiə Nazirliyindən açıqlama

“2026-cı ilin büdcəsi ilə Müdafiə Nazirliyinə ayrılacaq vəsaitin azalacağından xəbərsizəm”.

Bu sözləri Ermənistan müdafiə nazirinin müavini Hraçya Sarkisyan bildirib.

“Həyata keçirdiyimiz işlərin həcmini bu il eyni qaydada davam etdirəcəyik. Bu gələn il də belə olacaq. Orta müddətli proqramlarla nə planlaşdırılıbsa, həyata keçiririk, həmin o xərcləri də həyata keçirəcəyik. Büdcə dekabr ayında parlamentdə təsdiqlənəcək, düşünürəm ki, həmin vaxt təsdiqlənəndə daha dəqiq bilinəcək, amma yanaşma odur ki, orta müddətli xərclər proqramı ilə nə təsdiqlənibsə, gələn il də həmin o məbləğ olacaq”, – deyə rəsmi şəxs vurğulayıb.

Qeyd edək ki, o, Müdafiə Nazirliyinin 2024-cü ildə işlədiyi kimi, 2025 və 2026-cı ildə də eyni şəkildə fəaliyyət göstərəcəyini deyib.

Jurnalistlərin “Azərbaycan intensiv silahlanır, Ermənistan isə Müdafiə Nazirliyinin xərclərini artırmır” sualına isə Sarkisyan cavab olaraq deyib ki, Azərbaycanın hərbi büdcəsi son 30 ildə Ermənistanın dövlət büdcəsindən bir neçə dəfə çox olub.

“Əgər sizin sualınız “Bütün dövlət büdcəmizi elə artıraq ki, Azərbaycanın hərbi büdcəsinə çataq” şəklindədirsə, bu belə olmayacaq”, – deyə Ermənistan müdafiə nazirinin müavini vurğulayıb.