Ermənistan orduya uşaqları cəlb edir

Vətən müharibəsi nəticəsində Azərbaycanın torpaqlarını azad etməsi ilə paralel olaraq Ermənistanın kapitulyasiya aktına imza atması sülh və etimad quruculuğunu postmüharibə dövrünün ən aktual məsələlərindən birinə çevirdi. Lakin istər Ermənistan hakimiyyəti, istərsə də Qarabağdakı ermənilər ölkəmizin sülh əlini tutmaq əvəzinə, qeyri-adekvat mövqe sərgiləyib, hələ də silsilə təxribatlara imza atır.

Ən təəssüfedici məqam isə ermənilərin bu prosesə yetkinlik yaşına çatmayanları da cəlb etməsidir. Onlar yeniyetmələri və azyaşlıları müharibə cinayətlərinə hazırlamaqla hələ də mənfur niyyətlərindən əl çəkmədiklərini nümayiş etdirirlər.

Ermənilərin hərbi əməliyyatlara uşaqları cəlb etməsi ilk hal deyil. Bu cür hadisələr Birinci Qarabağ müharibəsi dövründə də qeydə alınıb. Halbuki, bu, hər şeydən əvvəl dinc erməni sakinləri ölümə göndərmək deməkdir. Üstəlik, mənfur qonşularımız bununla beynəlxalq qanunları, uşaq hüquqları ilə bağlı konvensiyaları kobud şəkildə pozur.

Təəssüf ki, bu gün ermənilər tərəfindən uşaqların da alət edilməklə həyata keçirilən terror aktları İŞİD, PKK, YPG kimi terror təşkilatlarının fəaliyətlərindən heç də fərqlənmir. Lakin VoMA, POGA və digər erməni silahlı qrupları tərəfindən Qarabağ ərazilərində icra edilən qanunsuz hərbi fəaliyyətlərə dünya ictimaiyyəti və beynəlxalq təşkilatlar tərəfindən diqqət yetirilmir. Halbuki, Rəsmi Bakı dəfələrlə Birləşmiş Millətlər Təşkilatı başda olmaqla, digər müvafiq beynəlxalq təşkilatlara bununla bağlı çağırışlar edib.