Ermənistan və Gürcüstan nazirlərinin görüşündə Azərbaycanla bağlı müzakirə

“Azərbaycanla münasibətlərin normallaşdırılması və sülh prosesində irəliləyişin əldə edilməsi məqsədilə aparılan danışıqlar davam edir”.

Bunu Ermənistanın xarici işlər naziri Ararat Mirzoyan yanvarın 30-u İrəvanda səfərdə olan Gürcüstanın xarici işlər naziri Maka Boçorişvili ilə görüşü zamanı deyib.

O bildirib ki, Ermənistanın mövcud mövqeyi dəyişməzdir.

“Biz sülh gündəliyinə sadiqik və bunu davam etdirəcəyik. Bu, sülh müqaviləsinə, nəqliyyat kommunikasiyalarının açılmasına və sərhədlərin delimitasiyasına aiddir. Ermənistan və Azərbaycan arasında sərhədlərin delimitasiyası prosesində artıq müəyyən razılaşmalar və addımlar atılıb”, – deyə A.Mirzoyan bildirib.

Maka Boçorişvili Gürcüstanın Cənubi Qafqazda davamlı sülhün bərqərar olunmasında son dərəcə maraqlı olduğunu bəyan edib. Bu da şübhəsiz ki, regionun inkişafına və mövcud potensialdan tam istifadəyə şərait yaradacaq.

“Ümid edirik ki, Ermənistan və Azərbaycan arasında davam edən normallaşma prosesi hər iki tərəf üçün məqbul olan nəticə ilə başa çatacaq. Bu da regionda davamlı sülhün təmin edilməsinə zəmin yaradacaq. Gürcüstan regionda əməkdaşlığın inkişafına töhfə verməyə həmişə hazırdır”, – deyə o qeyd edib.