Ermənistanın Azərbaycana qarşı yeni terroru

Ermənistan 30 ilə yaxın işğal müddətində torpaqlarımızda həyata keçirdiyi ekoloji terroru Naxçıvanla sərhəddə də davam etdirmək niyyətindədir. Çünki bu ölkənin Arazdəyən kəndində inşa etdiyi metallurgiya zavodunun illik istehsal gücü 180 min tondan yuxarıdır. Bu isə kifayət qədər böyük tullantı və zəhərli qaz deməkdir. Təbii ki, Azərbaycan bu cür ekoloji cinayətə göz yuma bilməz.

Ərazidə iri metallurgiya zavodu tikməklə Ermənistan növbəti dəfə beynəlxalq hüququn norma və prinsiplərini, xüsusilə də Birləşmiş Millətlər Təşkilatının Avropa İqtisadi Komissiyasının Transsərhəd kontekstdə ətraf mühitə təsirin qiymətləndirilməsi haqqında Konvensiyasını kobud şəkildə pozur. Pakta görə, bu cür layihələrin digər ölkələrin ərazisinə mənfi ekoloji təsiri olacağı halda, bu fəaliyyət həmin ölkənin müvafiq qurumları ilə razılaşdırılmalıdır. Lakin İrəvan bunun əksinə gedir.

Ermənistanın Azərbaycana qarşı ekoloji cinayəti ilk dəfə deyil. Bu ölkə bundan əvvəl “Metsamor” Atom Elektrik Stansiyasında təhlükəli vəziyyət yaradıb, Oxçuçayı çirkləndirib, Sərsəng su anbarını qurudub, Vejnəli, Qızılbulaq, Dəmirli və Söyüdlü qızıl və mis yataqlarını talan edib.