Ermənistanın növbəti riyakarlığı

Rəsmi İrəvan Azərbaycana qarşı düşmənçilik siyasətindən əl çəkmir. Bu dəfə bənzər addım ATƏT-də Azərbaycanın İrandakı Səfirliyinə qarşı terror hücumunu pisləyən bəyannamənin qəbulu zamanı müşahidə edilib.

Belə ki, 57 ölkənin üzv olduğu İslam Əməkdaşlıq Təşkilatı Xarici İşlər Nazirləri Şurasının Mavritaniyada keçirilmiş 49-cu sessiyası zamanı martın 17-də qəbul edilmiş 5 qətnamədən biri “Tehrandakı Azərbaycan Səfirliyinə qarşı hücum” adlı qətnamə olub.

Sənəddə bu ilin yanvarın 27-də baş vermiş silahlı hücum qəti şəkildə pislənilir, İran hökuməti baş vermiş hücumu hərtərəfli araşdırmağa, hücumu törədənləri cinayət məsuliyyətinə cəlb etməyə və “Diplomatik Əlaqələr haqqında” 1961-ci il Vyana Konvensiyasına uyğun olaraq Azərbaycanın İrandakı diplomatik nümayəndəliklərinin mühafizəsini təmin etməyə çağırılır. Lakin Ermənistan İranın sifarişi ilə eyni məzmunlu bəyannamənin ATƏT-də qəbul edilməsinə mane olub.

Təəssüf ki, 2 aya yaxın müddətdə davam edən müzakirələrə Ermənistan hər vəchlə maneçilik törədib və səfirliyə xain hücumu pisləyən, terror qurbanlarının ailələrinə başsağlığı diləklərinin çatdırıldığı və ədalətin təmin olunması məqsədilə hərtərəfli istintaq aparılmasının vacibliyinin vurğulandığı bəyannamənin qəbuluna imkan verməyib.