Fransalı kəşfiyyatçılar niyə qaçır? - Ermənistan müstəqilliyini itirə bilər?

Müxtəlif dövlətlərin kəşfiyyat orqanlarının daxilindən sızan məlumatlar əsasında dövri araşdırmaçı məqalələrlə çıxış edən “Observer Online”ın növbəti “Fransa kəşiyyatçıları ölkələrdən niyə qaçır?” başlıqlı araşdırma yazısında çoxsaylı yeni və qaranlıq məsələlərə toxunub.

Yazıda Fransanın Azərbaycanda və digər dövlətlərdə üzləşdiyi məsələlərə eyham vuran saysız ipucular və sızmalar, digər dövlətlərin marağına səbəb olan Fransa kəşfiyyatının üsul və metodları açıqlanıb.

Məqalədə qeyd olunub ki, Fransada erməni lobbisinin təşəbbüsləri və Afrikadakı uğursuzluqların fonunda yeni koloniya olmağa tam yarayan Ermənistan Paris silahlarının satışı üçün cəlbedici bazar olub. Bitərəf müşahidəçilər də bunu Qafqaz regionunda beynəlxalq hüquqla tanınan ərazi bütövlüyünü bərpa etmiş Azərbaycanla Ermənistan arasında bitmiş müharibənin alovlandırılması cəhdi və dayanıqlı sülhün bərqərar olmasına maneə kimi qiymətləndirir.

Müəllifin sözlərinə görə, Azərbaycanın tarixi qələbəsini həzm edə bilməyən Fransa bu hadisədən sonra Azərbaycanın milli maraqlarına qarşı fəaliyyət göstərməyə başlayıb. Bu da Fransa kəşfiyyatının özünü sərbəst buraxmağa vərdiş etmiş nümayəndələrinin ifşa olunmasına gətirib çıxardı.

“Qafqaz regionunun ən böyük gücü Azərbaycan geniş əks-kəşfiyyat və kəşfiyyat imkanlarına malik olan ölkədir, Fransa kəşfiyyatı agenturasına qarşı təbdirlər də silsilə həbslər, “persona non grata”lar və digər tədbirlərlə müşayiət olunub. Buraxılan səhvlərin pikində Fransada xarici kəşfiyyat orqanının rəhbəri və xarici işlər naziri vəzifəsindən azad edildi”, – deyə yazıda qeyd olunub.

Bundan başqa, məqalədə o da bildirilib ki, Fransa vətəndaşlarının casus kimi istifadə edilməsi ilə bağlı Azərbaycanda başlanılmış istintaq artıq müxtəlif nüfuzlu beynəlxalq təşkilatlara və regionlara da sirayət edib. Məlum olub ki, vaxtilə müxtəlif cinayətlərə yol vermiş kəşfiyyatçılarını Fransa sonradan gizlincə çoxsaylı ölkələrin təmsil olunduğu beynəlxalq təşkilatlara rəhbər postlara yerləşdirib. Onlardan biri Bakıda 2023-cü ilin dekabr ayında silsilə həbslər başlayan kimi Mərkəzi Asiyadakı beynəlxalq təşkilatın rəhbəri postunu başsız qoyub ilk reyslə Bişkek şəhərindən Fransaya qaçıb.