Füzulidə Azərbaycan-Özbəkistan QHT forumu keçirilir

Azərbaycanda fəaliyyət göstərən qeyri-hökumət təşkilatları (QHT) ilə Özbəkistanda fəaliyyət göstərən donor təşkilatlar arasında əməkdaşlıq barədə memorandum imzalanacaq.

Bu barədə Füzulidə keçirilən Azərbaycan-Özbəkistan Qeyri-Hökumət təşkilatlarının əməkdaşlıq forumu çərçivəsində Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva jurnalistlərə açıqlamasında bildirib.

Qeyd edilib ki, forumda təşkilatların ölkə başçılarına müraciəti səslənəcək.

"Bu forum Azərbaycan, Özbəkistan qeyri-hökumət təşkilatlarının həyatında ilk təşəbbüsdür və bu təşəbbüsün məhz Füzuli şəhərində Özbəkistanın Azərbaycan hökumətinə hədiyyə etdiyi məktəbdə həyata keçirilməsi təsadüfi deyil.

Forum çərçivəsində rəsmi çıxışlar, müxtəlif qeyri-hökumət təşkilatlarının təcrübə mübadiləsi, sonda isə hər iki qeyri-hökumət təşkilatının ölkə başçılarına müraciəti səslənəcək", – deyə A.Əliyeva bildirib.