Gürcü politoloqlar Azərbaycan-Gürcüstan münasibətlərindən danışdılar - Baku TV

“Azərbaycanla Gürcüstan sıx və aktiv strateji tərəfdaşlığı ən yüksək səviyyədə davam etdirir. Dünyanın müxtəlif yerlərindəki xaos vəziyyətinə baxmayaraq, biz Cənubi Qafqaz ölkələri dünya üçün nümunəyə çevrilirik”.

Bu sözləri Baku TV-yə verdikləri müsahibələrində gürcü politoloqlar bildiriblər.

Politoloq Giorgi Qoqua qeyd edib ki, Azərbaycan-Gürcüstan əlaqələri çoxəsrlik tarixi, siyasi və iqtisadi təməllərə əsaslanır. Onun sözlərinə görə, bu münasibətlər son dövrlərdə xüsusilə Cənubi Qafqazın qlobal siyasi arenada rolunun gücləndirilməsinə yönəlib.

Giorgi Qoqua bildirib ki, Prezident İlham Əliyevin Münxen Təhlükəsizlik Konfransındakı çıxışı və Gürcüstana təşəkkür etməsi də bunu bir daha təsdiqləyir:

“Avropa ilə Asiyanı birləşdirən əsas nəqliyyat-logistika dəhlizi kimi bölgəmiz Avropanın enerji təhlükəsizliyinin təmin olunmasında xüsusi əhəmiyyətə malikdir. Bu da öz növbəsində Cənubi Qafqaz ölkələrinin inkişafına mühüm töhfə verir”.

Digər bir politoloq Zaal Andjaparidze isə vurğulayıb ki, Azərbaycanla Gürcüstan arasında bütün sahələrdə, o cümlədən tranzit marşrutları istiqamətində güclü əməkdaşlıq mövcuddur.

Onun sözlərinə görə, Prezident İlham Əliyev Münxen Konfransındakı çıxışında bu məsələyə də toxunub:

“Hazırda Gürcüstan ərazisindən keçməklə Azərbaycan Avropaya müxtəlif enerji resursları ixrac edir. Təəssüf ki, son dövrlərdə Gürcüstanda bəzi qruplar Zəngəzur dəhlizinin açılmasından sonra ölkənin tranzit funksiyasını itirəcəyi ilə bağlı spekulyasiyalar yaymağa çalışırlar. Hesab edirəm ki, rəsmi Bakı və Tbilisi ikitərəfli strateji əlaqələrin inkişafına xüsusi diqqət göstərir. Heç bir spekulyasiya ölkələrimiz arasındakı münasibətlərə xələl gətirə bilməz”.