“Haber Global”da Azərbaycanın qələbəsi ilə bağlı reportajlar yayımlandı

“4 il öncə Azərbaycan İkinci Qarabağ müharibəsində 44 gün ərzində qələbə qazandı. Bu müharibədə qardaş ölkə 2908 şəhid verib, bu gün isə onları anır”.

Bu barədə “Haber Global” televiziyasının 27 Sentyabr – Anım Günü ilə əlaqədar Bakıdakı İkinci Fəxri xiyabandan hazırladığı reportajda deyilir.

Süjetdə 2023-cü ilin sentyabrında həyata keçirilən antiterror əməliyyatı haqqında da məlumat verilib.

“Haber Global”da yayımlanan digər reportajda isə bildirilib ki, İkinci Qarabağ savaşında öz torpaqlarını addım-addım işğaldan azad edən Azərbaycan müharibəni zəfərlə başa çatdırdı. Ermənistanın məğlubiyyətindən sonra noyabrın 10-da üçtərəfli bəyanat imzalandı. Lakin rəsmi İrəvan öhdəsinə götürdüyü məsələləri həll etməyi gecikdirir.

“Azərbaycan Ordusu və xalqı dövlət başçısı İlham Əliyevin liderliyi ilə dəmir yumruq kimi birləşdi. Azərbaycanlı gənclər cəbhədə canlarını fəda etməyə, analar övladlarını şəhid verməyə hazır idilər. Çünki Qarabağ şərəf məsələsi, Vətən demək idi”, – deyə reportajda vurğulanıb.