Hərbçilərimizin Türkiyəyə getmə səbəbi | Müdafiə Nazirliyi məlumat yaydı

Qarsda Azərbaycan-Türkiyə hərbi təlimi keçiriləcək. Bu barədə Müdafiə Nazirliyi məlumat verib.

Bildirilib ki, “Qış təlimi – 2025”ə hazırlıq məqsədilə dövlət bayraqlarının dəyişmə mərasimi keçirilib.

Əlahiddə Ümumqoşun Ordu komandanlığından bayrağı qəbul edən bayraq taqımı Naxçıvan şəhərindən Sədərək sərhəd-keçid məntəqəsinə – Araz çayı üzərindəki “Ümid” körpüsünə doğru yürüşə başlayıb. Eyni anda Türkiyənin bayraq taqımı da Qars şəhərindən mərasimin keçiriləcəyi ünvana doğru yürüş edib.

“Ümid” körpüsündə Azərbaycan və Türkiyənin dövlət himnləri ifa edildikdən sonra bayraqların dəyişmə mərasimi olub. Sonra təlimə cəlb ediləcək şəxsi heyət və hərbi texnikaların təlim yerinə yola salınması münasibətilə tədbir keçirilib.

Təlimin planına əsasən, yaşayış məntəqələrində, çətin relyefli ərazilərdə, dərin qar və şiddətli soyuqlarda müxtəlif təlim-döyüş tapşırıqlarının yerinə yetirilməsi nəzərdə tutulub.