İki ölkə arasında imzalanan saziş nə vaxt qüvvəyə minəcək? - Detallar açıqlandı

24 iyun 2025 451 baxış

Azərbaycanla Çin arasında vizadan qarşılıqlı azad edilmə Sazişi gələn ay qüvvəyə minir.

Belə ki, 23 aprel 2025-ci il tarixində Pekində imzalanan “Azərbaycan Respublikası Hökuməti ilə Çin Xalq Respublikası Hökuməti arasında ümumvətəndaş pasportlarına malik vətəndaşların vizadan qarşılıqlı azad edilməsi haqqında Saziş”in qüvvəyə minməsi üçün zəruri olan dövlətdaxili prosedurlar tamamlanıb.

Xarici İşlər Nazirliyindən verilən məlumata görə, müvafiq müddəaya uyğun olaraq, saziş 16 iyul 2025-ci il tarixindən qüvvədə olacaq.

Sazişə əsasən, Azərbaycan Respublikasının etibarlı ümumvətəndaş pasportlarına malik vətəndaşları və Çin Xalq Respublikasının etibarlı ümumvətəndaş pasportlarına malik vətəndaşları digər ölkə ərazisinə daxil olmaq, oranı tərk etmək və yaxın tranzit keçmək üçün hər səfər ərzində 30 gündən çox olmamaqla və 180 günlük dövr ərzində ümumilikdə 90 gün müddətini aşmamaqla viza tələbindən azad edilir.

#Xarici İşlər Nazirliyi