İlham Əliyev Xocalının Xanyurdu kəndində olub, sakinlərlə görüşüb

Prezident İlham Əliyev iyulun 18-də Xocalının Xanyurdu kəndində olub.

Dövlət başçısı kəndə köçən sakinlər – Rasim Cavadovun və Kərəm Abbasovun evlərində olub.

Qeyd edək ki, Xanyurdu kəndi Xocalı rayonunun Ballıca kənd inzibati ərazi dairəsinə daxildir. Kənddə 40 fərdi ev artıq əsaslı bərpa olunub, ilin sonunadək daha 65 fərdi evin bərpası nəzərdə tutulub, 2026-cı ildə isə 93 fərdi ev təmir və bərpa olunacaq.

Bu il iyulun 14-də 33 ailə, ümumilikdə 122 nəfər doğma Xanyurdu kəndinə qayıdıb.

Hazırda kəndin sosial infrastrukturunun müasir səviyyədə qurulması üçün zəruri işlər görülür. Elektrik xətti təmir-bərpa edilib, sayğaclaşdırma prosesinə başlanılıb, təbii qaz xətti çəkilib.

Mövcud xətt bərpa olunub, artezian quyusu, su anbarı və içməli su şəbəkəsi təmir edilib, rabitə xətti çəkilib, abonentlərin stasionar telefon, internet və İPTV xidmətləri ilə əhatə edilməsi təmin olunub. Kənddaxili yollar asfaltlanıb. Ümumtəhsil müəssisəsinin binasının təmir-bərpası ilə bağlı hazırlıq işləri görülür. Kənddə istirahət parkı da salınıb.

Prezident İlham Əliyev Təzəbinə və Xanyurdu kəndlərinə köçən sakinlərlə görüşüb, onlarla söhbət edib.