İordaniyalı politoloq Azərbaycana olan sevgisindən danışdı

“Mən Azərbaycanı ən ülvi hisslərim, ən saf məhəbbətim ilə sevirəm. Hətta ölkənizə 3 kitab da həsr etmişəm. Kitablardan biri Qarabağa, biri Azərbaycanın siyasi dəsti-xəttinə, üçüncüsü isə Ümummilli lider Heydər Əliyevə həsr olunub. Bu sözügedən kitabı məhz Prezidentiniz İlham Əliyevə hədiyyə etməyi planlayıram”.

Bunu Baku TV-yə açıqlamasında iordaniyalı politoloq Omar Mohammad Nazzal Armouti deyib.

“Heydər Əliyev ilə bağlı xatirələrimi sizinlə bölüşmək istəyirəm. O, möhtəşəm bir şəxsiyyət idi. Müasir Azərbaycanın banisi, qurucusu, ölkəni dirçəldən bir dahi idi.

Xalqın ona olan sevgisi məhz bu fədakarlıqdan irəli gəlir. Bizim ölkələr arasında hər zaman sıx dostluq əlaqələri olub. İordaniya xalqının rəğbətini qazanmağı bacaran Heydər Əliyev iki ölkə arasında bir çox siyasi, iqtisadi və digər əlaqələrin möhkəmlənməsinə əvəzsiz töhfələr verib”, – o bildirib.