İran XİN Ağbənd-Kəlalə körpüsünün istifadəyə veriləcəyi tarixi açıqladı - Baku TV

“Ağbənd-Kəlalə körpüsünün tikintisinin Novruz bayramına qədər tamamlanması planlaşdırılır”.

Bunu Bakıda səfərdə olan İranın xarici işlər nazirinin müavini Vahid Cəlalzadə brifinqdə bildirib.

Onun sözlərinə görə, hazırda orada dörd zolaqdan ibarət yolun salınması üçün işlər gedir.

Diplomat ölkələrimiz arasında mövcud münasibətlərin inkişaf dinamikasından da söz açıb. Həmçinin rəsmi Tehranın Azərbaycan və Ermənistan arasında sülh prosesini dəstəklədiyini söyləyib:

“Araz çayı üzərində Ağbənd-Kəlalə avtomobil körpüsünün tikintisini Novruz bayramına qədər tamamlamağı planlaşdırırıq. Hazırda avtomobil yolunun tikintisi sürətlə davam edir. Yolu genişləndirib 4 zolaqlı edirik.

Sevindirici haldır ki, Azərbaycanla İran arasındakı münasibətlər müsbət dinamikada inkişaf edir. Xarici işlər naziri Ceyhun Bayramov və Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyevlə görüşdüm. Bu görüşlərdə iki ölkə arasındakı birgə layihələrin inkişafını müzakirə etdik. Biz Cənubi Qafqazda sülh və əmin-amanlığın tərəfdarıyıq. İran sülh və sabitliyə əsaslanan bütün addımları, həmçinin Azərbaycan və Ermənistan arasında hər iki dövlətin maraqlarına xidmət edən ticari-iqtisadi əlaqələri dəstəkləyir”.