İrəvan şəhərində sensasiyalı tapıntı: xanın şəxsi əşyaları tapıldı | QƏRBİ AZƏRBAYCAN XRONİKASI

“Qərbi Azərbaycan Xronikası” layihəsi çərçivəsində “Erməni tədqiqatçı tapdığı əşyalarla saxta tarixi ifşa etdi” adlı veriliş efirə gedib.

Verilişdə erməni tarixçi və arxeoloqlarının gerçək, üzdə olan tarixi dəyişib, saxta don geyindirib, haylaşdırmaq kimi missiyasından bəhs olunur.

Bildirilib ki, bu şərəfdən uzaq missiyanı Rusiya kəşfiyyatının xəfiyyəsi Xaçatur Abovyan xeyli inkişaf etdirmiş və çağdaş tarix talançıları irsini yaratmışdı.

Müəmmalı şəkildə itkin düşən, ya da missiyasını həyata keçirib öz həyatına qayıdan yezidi kürd ədəbiyyatı mütəxəssisi olan X.Abovyanın yetirmələri onu saxtakarlıq fəaliyyətləri ilə geridə qoyublar. Rahatlıqla bütün dəlilləri bir kənara atıb 15-ci əsr Qaraqoyunlu Əmir Səəd türbəsini Türkmənistana, Göy məscidi İrana, Qıpçaq-Alban irsini Qazaxıstana bağlayıb, Azərbaycan kəlməsini itirmək istəyirlər.

Qeyd olunub ki, tarixin qənimi ermənilər İrəvan şəhərinin köhnə simasını tam dağıdıb, torpaq altında gizlədiblər. İndi qazıntı zamanı üzə çıxan tarixi həqiqətləri eyni həyasızlıqla danmaqla məşğuldurlar. Azərbaycan şəhəri İrəvanın Qantar bazarını söküb, yerində uşaq parkı salıblar.

İndi qazıntı zamanı buradan tapılan maddi sübutlar erməni yalanı müəlliflərini çətinə salıb deyə min cür yalanla nağıllar uydurub, gerçəyi yenidən torpaq altına gömürlər.

Süjetdə Tarixi-Mədəni İrsin Araşdırma Mərkəzinin ekspedisiya rəhbəri Meri Safaryanın qazıntılar zamanı tapdığı İrəvan xanına aid şəxsi əşyalar, eləcə də Azərbaycan irsinə aid maddi və mənəvi sübutlar göstərilir. Onun sözlərinə görə, builki qazıntılar hava şəraitinə görə 15 gün davam etdi və xilasetmə xarakteri daşıyırdı: “Əgər maliyyə məsələsi həll olunarsa, gələn il İrəvanın mərkəzində gizlənmiş tarix üzə çıxacaq”.