Latviya Azərbaycanın COP29-a ev sahibliyini alqışladı

“Azərbaycan Latviya üçün mühüm tərəfdaşdır. Bu il diplomatik münasibətlərimizin 30 ili tamam olur. Amma bizim mədəniyyət, incəsənət sahəsində əlaqələrimiz daha uzun tarixə malikdir. Latviya ilə Azərbaycan arasında iqtisadi əməkdaşlığın dərinləşdirilməsi üçün də çox imkan var”.

Bu sözləri jurnalistlərə açıqlamasında Latviya parlamentinin sədri Dayqa Mierina bildirib.

“Biz konkret addımlar barədə danışdıq. Söhbət Latviyanın Şuşa şəhərinin yenidən qurulmasında necə iştirak edə, regionun bərpasına necə kömək edə biləcəyindən gedir. Biz kənd təsərrüfatı, logistika, turizm, mübadilə, təhsil və mədəniyyət sahələrində potensial əməkdaşlığı müzakirə etdik.

Həmçinin Azərbaycanın suverenliyini və ərazi bütövlüyünü dəstəklədiyimizi bir daha ifadə etdik. Parlamentlərimizin müxtəlif komitələri və ya komissiyaları arasında daha sıx əməkdaşlığın qurulması imkanlarını müzakirə etdik.

Məsələn, təhsil, mədəniyyət sahəsi, ölkələrimiz arasında tələbə mübadiləsinin qurulması və bir çox başqa sahələrlə bağlı fikir mübadiləsi apardıq, eləcə də biz Azərbaycanın bu il BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına ev sahibliyi etməsini alqışlayırıq və təbrik edirik”, – o qeyd edib.