Mətbuat Şurasından Prezident İlham Əliyevə müraciət

Mətbuat Şurasının İdarə Heyəti Azərbaycanın dövlət başçısı seçilməsinin iyirmi illiyi ilə bağlı Prezident İlham Əliyevə müraciət ünvanlayıb.

Müraciətdə deyilir ki, jurnalistikaya diqqət, peşənin nüfuzunun yüksəldilməsinə həssas yanaşma, onun ölkəmizin həqiqətlərinin təbliği istiqamətindəki missiyasına verilən dəyər yüksək qədirbilənlik nümunəsidir.

Dövlət idarəçiliyində, beynəlxalq münasibətlərdə, milli mənafe naminə mübarizədə medianın rolu, jurnalistlərlə məqsədyönlü ünsiyyətin nə dərəcədə yüksək önəm daşıdığı bütün aydınlığı ilə nümayiş etdirilib.

“Media və mətbuata göstərdiyiniz həssas münasibət, jurnalistlərlə işgüzar təmaslara verdiyiniz önəm bu il Milli Mətbuat Günündə müqəddəs, əziz Şuşamızda gerçəkləşən Beynəlxalq Media Forumunda da örnək sayılacaq təcəssümünü tapdı.

Sərəncamınız əsasında yaradılmış Medianın İnkişafı Agentliyinin reallaşdırdığı fəaliyyət, beynəlxalq standartlara cavab verən “Media haqqında” Qanunun qəbulu sahəyə fundamental yanaşmanı ortaya qoyur”, – deyə müraciətdə bildirilib.

Müraciətin sonunda isə azərbaycanlı jurnalistlər adından dövlət başçısına sonsuz minnətdarlıq çatdırılıb.