Müstəqillik yolunda tarixi dönüş | Azərbaycan xalqı əzminin nəticəsini necə aldı? - ARAŞDIRMA

Baku TV-də 18 Oktyabr – Müstəqilliyin Bərpası Gününə həsr olunmuş araşdırma yayımlanıb.

Qeyd edilib ki, Azərbaycanda tarixən gedən proseslərə baxsaq, görə bilərik ki, zaman-zaman bu torpaqlar işğalçıların, yadellilərin talanlarına məruz qalıb. Hər dəfə də bu xalq güc taparaq yaşadığı torpaqlarda öz hüququnu bərpa edib.

“Bu mübarizə yaxın keçmişə qədər davam edir. 80-ci illərin sonundan başlayan azadlıq mübarizəmiz 1991-ci ildə müstəqil Azərbaycana nail olmaqla başa çatdı. Oktyabrın 8-də Ali Sovetdə başlanan müzakirələr bir neçə gün davam edir və nəhayət, oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı qəbul olunur”, – deyə əlavə olunub.

Vurğulanıb ki, müstəqilliyin saxlanılması onun bərpası qədər ağır və məsuliyyətli bir prosesdir. Bir tərəfdən Qarabağ müharibəsi, digər tərəfdən isə dünya ölkələrinə öz haqlı səsimizi, sözümüzü çatdıra bilməməyimiz bizi bir çox problemlərlə qarşı-qarşıya qoydu:

“Çox keçmir ki, 1992-ci ildə ABŞ Konqresi tərəfindən Azərbaycana birbaşa dövlət yardımını qadağan edən düzəliş erməni lobbisinin təşəbbüsü ilə qəbul edilir. Bu qadağa sayəsində Azərbaycan iqtisadi və siyasi sabitliyi asanlaşdırmaq üçün ABŞ hökumətindən birbaşa yardım almayan yeganə postsovet dövləti olur”.

Bir-birinin ardınca gələn çətinliklər millətimizi sarsıtmır. Bu gün tam əminliklə və inamla deyə bilərik ki, müstəqilliyin bərpasından sonra öz iqtisadiyyatının gücü və xalqın iradəsi ilə ayaqda qalmağı bacaran azsaylı dövlətlərdən biriyik.