Nensi Pelosiyə yeni əmr: Ofisi tərk edin!

ABŞ-nin Nümayəndələr Palatasının keçmiş spikeri Nensi Pelosi respublikaçı Kevin Makkartinin istefasından sonra ofisindən qovulub.

Bildirilib ki, spiker səlahiyyətlərini icra edən Patrik Makhenri Nensi Pelosiyə elektron məktub vasitəsilə Kapitolidəki ofisini tərk etməli olduğu barədə məlumat verib. “Zəhmət olmasa, ofisi boşaldın, otağın kilidi dəyişdiriləcək”, – deyə məktubda vurğulanıb.

Bildirək ki, bura yeni spikerin ofisinin istifadəsinə veriləcək. Nümayəndələr Palatasının yalnız bəzi üzvlərinin Kapitolidə bu tipli əlavə otaqları var və qanunvericilər ənənəvi olaraq binanın Senat qanadındakı ofislərdən istifadə edirlər.

Bundan əvvəl ABŞ Konqresinin səsvermə nəticələrinə əsasən, Kevin Makkartinin nümayəndələr palatasının sədri vəzifəsindən uzaqlaşdırıldığı məlum olub. Onun yerinə ölkənin Şimali Karolina ştatının nümayəndəsi Patrik Makhenri müvəqqəti spiker olaraq təyin edilib.

Qeyd edək ki, kaliforniyalı demokrat Nensi Pelosi ermənipərəst mövqeyi ilə tanınır. O, 75 konqresmenin ABŞ Prezidenti Cozef Baydenə Ağ Evi Azərbaycana qarşı sanksiyalar tətbiq etməyə çağıran məktubunun təşəbbüskarlarından biridir.