Növbədənkənar Prezident seçkiləri ilə bağlı Təqvim planı təsdiqlənib

Azərbaycanda prezidentliyə namizədlərin irəli sürülməsinə başlanılır.

Mərkəzi Seçki Komissiyasının qərarına əsasən, Növbədənkənar Prezident seçkiləri 2024-cü il fevralın 7-nə təyin edilib. Qərar rəsmi dərc edildiyi gündən qüvvəyə minib. 2024-cü il yanvarın 15-dən isə növbədənkənar Prezident seçkiləri ilə əlaqədar seçkiqabağı təşviqatın aparılmasına başlanılacaq.

Qeyd edilib ki, proses fevralın 6-sı saat 8:00-da dayandırılacaq. Bu, Mərkəzi Seçki Komissiyasının dekabrın 8-də keçirilən iclasında təsdiqlənən növbədənkənar Prezident seçkilərinin keçirilməsi üzrə əsas hərəkətlərin və tədbirlərin təqvim planında əksini tapıb. Həmçinin 2024-cü il yanvarın 8-dək səsvermə günü xarici dövlətlərdə olan və konsul qeydiyyatına durmuş seçicilərin səs verməsi üçün seçki məntəqələrinin yaradılmasına başlanılacaq.

2024-cü il yanvarın 28-dək seçki bülletenləri hazırlanacaq. 2024-cü il yanvarın 31-dək isə səsvermənin keçirilmə tarixi, vaxtı və yeri barədə bildirişlərin seçicilərə paylanması yekunlaşacaq. Həmçinin 2024-cü il fevralın 17-dək MSK Prezident seçkilərinə yekun vurulması və nəticələrin təsdiq olunması üçün Konstitusiya Məhkəməsinə təqdim ediləcək.

Mərkəzi Seçki Komissiyası növbədənkənar Prezident seçkiləri ilə əlaqədar 2024-cü il yanvarın 18-dək “exit-poll” keçirmək niyyətində olan təşkilatların akkreditasiya üçün təqdim etdikləri sənədləri qəbul edəcək. Gələn il yanvarın 28-dək isə “exit-poll” keçirmək üçün müraciət etmiş təşkilatların akkreditasiyası barədə qərar qəbul olunacaq.

Qeyd edək ki, dövlət başçısı İlham Əliyev dekabrın 7-də Azərbaycanda növbədənkənar Prezident seçkilərinin elan edilməsi barədə Sərəncam imzalayıb. Sərəncamla 2024-cü il fevralın 7-də Azərbaycanda növbədənkənar Prezident seçkiləri keçiriləcək.