Orta dəhlizin rəqəmsallaşması üçün yol xəritəsi qəbul olunub

BMT-nin Mərkəzi Asiya Ölkələrinin İqtisadiyyatları üçün Xüsusi Proqramı – SPECA-nın iştirakçı ölkələrinin dövlət və hökumət başçılarının noyabrın 24-də Bakıda keçirilmiş Zirvə görüşünün yekununa dair Bakı Bəyannaməsi qəbul olunub.

Sammit iştirakçıları sənəddə proqrama qoşulan ölkələrin iqtisadi əməkdaşlıq və regional inteqrasiya imkanlarından müştərək istifadə edilməsi məqsədilə SPECA-nın rolunun gücləndirilməsi barədə öz niyyətlərini ifadə ediblər.

Bəyanata uyğun olaraq rəqəmsallaşma və tranzit marşrutlarının yaşıl transformasiyası, həmçinin ticarət və nəqliyyat prosedurlarının sadələşdirilməsi və energetika birləşmələri, o cümlədən Şərq-Qərb Transxəzər Orta Dəhlizi çərçivəsində yaşıl enerji daxil olmaqla, əməkdaşlıq sahəsində bilavasitə prioritet sahə və bu məqsədlə Transxəzər beynəlxalq nəqliyyat marşrutu üzrə Multimodal Məlumat və Sənədlərin Rəqəmsallaşdırılması üzrə Yol Xəritəsinin qəbul edilməsi qərara alınıb.

SPECA-nın Çoxtərəfdaşlı Məqsədli Fondunun yaradılmasını alqışlayan bəyanat müəllifləri bununla bağlı beynəlxalq tərəfdaşları Fondun fəaliyyətinə töhfə verməyə dəvət etməyə qərar veriblər.

Bəyanatda həmçinin Şərq-Qərb Transxəzər Orta Dəhlizinin SPECA-nın iştirakçı ölkələri ilə Asiya və Avropanın müxtəlif regionlarının nəqliyyat əlaqələrinin yaxşılaşdırılmasına diqqəti cəmləşdirmək tövsiyə edilib.