Oskanyan Ermənistanın xarici siyasətindən danışdı | Qarşılaşdığımız təhlükələr hiss olunur…

Qarşılaşdığımız təhlükələr hiss olunur, böyükdür və hamımıza təsir edəcək.

Bunu Ermənistanın sabiq xarici işlər naziri Vardan Oskanyan deyib.

Sabiq nazir qeyd edib ki, bu gün Ermənistanın nə bir etibarlı müttəfiqi, nə də dostu var.

“Xarici siyasət arenasında heç bir ölkə Ermənistanı ciddi qəbul etmir. Bizim heç bir xarici investisiyamız və iqtisadi siyasətimiz yoxdur. Bu da nəticədə istər-istəməz iqtisadi iflasa gətirib çıxaracaq. Bizim diasporla münasibətlərimiz minimaldır. Diaspor təşkilatları daxilində ciddi parçalanmalar mövcuddur”, – o qeyd edib.

V.Oskanyan vurğulayıb ki, bundan sonra da çox böyük təhlükələrlə üz-üzə qalacaqlar:

“Bu da Ermənistanın hazırkı hakimiyyətinin səriştəsizliyi ucbatından zəifliyini daha da dərinləşdirəcək”.

Onun sözlərinə görə, əgər Ermənistanda minimal diplomatik imkanlar olmasa, o zaman sərhədin demarkasiyası adı altında ən azı anklavlar şəklində əlavə ərazilərini itirəcəklər:

Ermənistanın sərhədləri dəyişəcək. Türkiyə tərəfinin tələbi ilə konstitusiyaya dəyişiklik ediləcək. Ermənistanın beynəlxalq məhkəmələr qarşısındakı qanuni iddiaları geri alınacaq, 300 min azərbaycanlı Ermənistana qayıdacaq, ən təhlükəlisi isə Zəngəzurun bir hissəsi Azərbaycana veriləcək”.

ABŞ-nin Zəngəzur dəhlizi ilə bağlı mövqeyini şərh edən V.Oskanyan bildirib ki, Dövlət Departamentinin sənədlərinin ən praktik tərəfi həmin sənədin Ermənistanın Azərbaycana istənilən ərazi, dəhliz, hətta yolun verilməsində danışıqlar mövqeyini əhəmiyyətli dərəcədə gücləndirməkdən ibarətdir.