Paşinyandan Zəngəzur dəhlizi ilə bağlı önəmli açıqlama

“Tramp marşrutu”nun Ermənistan hissəsinin tikintisinə 2026-cı ilin ikinci yarısında başlanılacaq”.

Bunu Ermənistanın Baş naziri Nikol Paşinyan parlamentdə keçirilən “hökumət saatı”nda deyib.

Onun sözlərinə görə, 2025-ci ilin sonuna qədər bütün detallar müzakirə ediləcək və plan təqdim olunacaq. Paşinyan bunu ABŞ Prezidenti Donald Trampın administrasiyasının ağır iş qrafiki ilə əlaqələndirib.

Ermənistanın Baş naziri bildirib ki, hər şeyin vaxtında həll olunmasına nəzarət ediləcək.

“Dəmir yolu xətti Sovet İttifaqı dövründəki marşrut üzrə çəkiləcək, çünki başqa yolun inşası real görünməzdi. Elektrik xətləri və qaz kəmərinin haradan keçəcəyi hələ məlum deyil.

Xəritə ilə bağlı problem yoxdur, amma relyefə görə tələblər dəyişə bilər”, ‒ deyə Paşinyan bildirib.

O əlavə edib ki, şərq-qərb yolu şimal-cənuba inteqrasiya olunacaq.

Zəngəzur dəhlizi ilə neft kəmərinin keçməsinə münasibət bildirən Paşinyan vurğulayıb ki, bu məsələ neftin qiymətindən asılıdır.

Paşinyan Vaşinqtonda imzalanan birgə bəyannaməni xatırladaraq “Tramp marşrutu”nun bütün tərəflər üçün sərfəli olacağını qeyd edib.