Prezident monteneqrolu həmkarına təbrik məktubu ünvanlayıb

Prezident İlham Əliyev monteneqrolu həmkarı Yakov Milatoviçə məktub ünvanlayıb.

Məktubda deyilir:

“Hörmətli cənab Prezident, Monteneqronun milli bayramı münasibətilə sizə və bütün xalqınıza öz adımdan və Azərbaycan xalqı adından ən səmimi təbriklərimi çatdırıram.

Azərbaycan Monteneqro ilə münasibətlərinin inkişafına böyük önəm verir. Keçən ilin noyabrında COP29-da iştirak etmək üçün sizin ölkəmizə səfəriniz Azərbaycan-Monteneqro əlaqələrinin inkişafı baxımından əhəmiyyət kəsb edir.

Hazırda müxtəlif sahələrdə, xüsusilə də iqtisadiyyat, turizm, sərmayə qoyuluşu və digər istiqamətlər üzrə qarşılıqlı faydalı əməkdaşlığımızın əhatə dairəsinin genişləndirilməsi üçün yaxşı imkanlar mövcuddur. Bu əlamətdar gündə sizə möhkəm cansağlığı, işlərinizdə uğurlar, dost Monteneqro xalqına daim əmin-amanlıq və firavanlıq diləyirəm”.