Prezident Ombudsmanların Beynəlxalq Bakı Forumunun iştirakçılarına müraciət ünvanladı

“Ermənistan beynəlxalq humanitar hüquqdan irəli gələn öhdəliklərini pozaraq Birinci Qarabağ müharibəsində itkin düşmüş şəxslərin taleyi və kütləvi məzarlıqların dəqiq yeri haqqında məlumatları təqdim etməkdən imtina edir. Ermənistan törətdiyi bütün cinayətlərə görə üzr istəməlidir”.

Bu fikir isə Prezident İlham Əliyevin “İqlim dəyişikliyi və insan hüquqları: ombudsmanların və milli insan hüquqları təsisatlarının rolu” mövzusunda təşkil olunan Beynəlxalq Bakı Forumunun iştirakçılarına müraciətində yer alıb.

“Münaqişə bitsə də, əfsuslar olsun ki, Ermənistanın 30 illik hərbi təcavüzünün ağır fəsadları hələ də davam edərək insanların həyatına və ətraf mühitə böyük təhlükə yaradır. Ermənistan uzun müddət işğal altında saxladığı ərazilərimizdə ekosid, urbisid, kultursid törədərək torpaqlarımızı və çaylarımızı çirkləndirib və zəhərləyib, meşələrimizi məhv edib, şəhər və kəndlərimizi dağıdıb, habelə burada çoxsaylı minalar basdırıb. Eyni zamanda xalqımızın bəşəri əhəmiyyətə malik mədəni irsi dağıdılıb, dini-mədəni abidələrimiz yerlə yeksan edilib”, – deyə dövlət başçısı bildirib.