Prezidentin xüsusi nümayəndəsi Laçında görülən işləri açıqladı

"Yeni sakinlər Laçına köç etdikcə, bizim qarşımızda duran vəzifələr artır".

Bunu Şərqi Zəngəzur iqtisadi rayonuna daxil olan Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov deyib.

O bildirib ki, artıq məktəb fəaliyyətə başlayıb. Orada artıq 70-dən çox şagird təhsil alır. Məsim Məmmədovun sözlərinə görə, eyni zamanda şəhərin yüksək hissəsindəki Zerti kəndində Aqro Sənaye Parkında da işlər artıq başa çatmaq üzrədir:

“Burada 40-dan çox müəssisənin yaradılması nəzərdə tutulub. Onların yarısı bu gün artıq fəaliyyətə başlayıb”.

Laçın şəhərində infrastruktur işlərinin davam etdirildiyini vurğulayan Məsim Məmmədov çoxmənzilli yaşayış binalarının tikintisinin planlaşdırıldığını da diqqətə çatdırıb:

“Laçın rayonu ərazisində artıq Zabux kəndinin tikintisi başa çatır. Sus kəndini isə gələn ilin yaz aylarında çalışacağıq ki, təhvil verək. Sus kəndinə 300-dən çox sakinin köçürülməsi nəzərdə tutulub. Gələn ilin birinci yarısında Güləbird kəndinin inşasına başlanılacaq.

Bundan əlavə, gələn ilin birinci yarısında Qorçu və Şəlvə kəndinin layihələndirilmə işləri başa çatacaq. Beynəlxalq hava limanında da işlər sürətlə davam edir, planla 2024-cü ilin sonu, 2025-ci ilin əvvəlinə hava limanı təhvil veriləcək”.